အတိတ်စိမ်း

သူ့အရှေ့မှာချထားသည့် ကော်ဖီခွက်နှင့် မနက်စာကို စိုက်ကြည့်နေသော်လည်း သူတကယ်မြင်နေသည်က ငွေ တွေ ဖြစ်သည်။ ငွေတွေမှ အထုပ်လိုက် အထပ်လိုက် မြင်နေရ၏။ ပြီးတော့ ငွေထုပ်တွေကို ပစ်မြှောက်ကာ ခုန်ပေါက် ပျော်မြူးနေကြသော လူတွေကို ပြန်မြင်နေမိသည်။ ညက အိပ်မက်သည် တော်တော်ထင်ရှားသည့် အိပ်မက်ဖြစ်၏။

အိပ်မက်ထဲတွင် လူတွေ အများကြီး တွေ့ရသည်။ ထိုလူတွေ ကိုင်ထားသည့် ငွေထုပ်တွေကိုလည်း မြင်ရသည်။ ထိုလူတွေသည် အစိမ်းရောင် သံပန်းခြံစည်းရိုး တစ်ခုအရှေ့တွင် ပျော်ရွှင်စွာ ခုန်ပေါက်နေကြခြင်းဖြစ်သည်။ ထိုခြံစည်းရိုးကို သူမှတ်မိသည်။ အောက်ပိုင်းတဝက်ကို အုတ်ဖြင့် စီထားပြီး အပေါ်ပိုင်း သံပန်းပုံစံတပ်ထားကာ အစိမ်းရောင် သဘောင်္ဆေး သုတ်ထားသော ထို ခြံစည်းရိုးသည် သူတို့ခြံစည်းရိုးဖြစ်ကြောင်း သေသေချာချာ မှတ်မိသည်။ သူတို့ခြံအပြင်ဘက်တွေ သူ မမှတ်မိသော လူတွေက ငွေထုပ်တွေကို ပစ်မြှောက်ကာ ပျော်ရွှင်ခုန်ပေါက် နေကြသည်ကို သူအိပ်မက် မက်ခဲ့ခြင်းဖြစ်သည်။

ထိုသူတွေ အားလုံး နှစ်လုံးထီ ပေါက်ခြင်းကြောင့် ငွေထုပ်တွေကို ပစ်မြှောက်ကာ ပျော်ရွှင်နေကြသည်ကိုလည်း အိပ်မက်ထဲတွင် သိခဲ့သည်။ သို့သော် မည်သည် နံပါတ် ဆိုသည်ကိုတော့ သူသေသေချာချာ မမှတ်မိပါ။ မနက်အိပ်ယာနိုးချိန်မှ စ၍ အိမ်သာတက်ရင်း မျက်နာသစ်ရင်း အဝတ်လဲရင်း သူ အပြင်းအထန် တွေးနေမိသည်မှာ ညက အိပ်မက်ထဲက ဂဏာန်း ဖြစ်သည်။ ဂဏာန်း ၂ လုံးထဲ ဖြစ်ရဲ့နဲ့ သူ မမှတ်မိခြင်းကို အားမလို အားမရ ဖြစ်နေရ၏။ ရှေ့ဂဏာန်းက ၃ နဲ့ စသလိုလို ထင်မိသော် သေသေချာချာ တွေးတော့ မဟုတ်သေးဘူးဟု ထင်မိပြန်သည်။ ဒါဆို ၈ များလား ဆိုတော့လည်း မသေချာ မရေရာ။

ဒီ နံပါတ်ကို သိရမှ ဖြစ်မည်။ ဒီလိုအိပ်မက်မျိုးကို သူယုံကြည်သည်။ အိပ်မက်အရ တစ်ကွက်ထဲထိုးရင်း ပွပေါက်တိုးသွားသော လူများကို သူ အခါခါတွေ့ခဲ့ဖူးသည်။ စဉ်းစားစမ်းး.. ဒီ ဂဏာန်းလေး နှစ်လုံးထဲကို ဘာအတွက် တွေးလို့မရရမှာလဲ။ သူ သိရမှ ဖြစ်မည်။ ဒါ ဘဝ အပြောင်းအလဲ ဖြစ်သွားနိင်သည်မဟုတ်လား။ သူ့အိပ်မက်ကို အစနေရာမှ ပြန်တွေးကြည့်သည်။

အိပ်မက်ထဲမှ လူတွေ လက်ထဲတွင် ဘောက်ချာ အပိုင်းလေးတွေကိုယ်စီ ကိုင်ရင်း လမ်းမပေါ် ထွက်လာကြသည်။ လူတစ်ချို့က အော်ဟစ်နေကြသည်။ တစ်ချို့က ခုန်ပေါက်ရင်း အချင်းချင်း ဘောက်ချာလေးတွေ ပြကာ ပွေ့ဖက်ကြသည်။ တစ်ယောက်နှင့် တစ်ယောက် လက်များဆွဲယမ်းကာ ဝမ်းသာ ရွှင်မြူးနေကြသည်။ လမ်းမတစ်လျှောက်လုံး ဆူညံနေသည်။ ထို့နောက်မြင်ကွင်းက နောက်တစ်ခု ပြောင်းသွားသည်။ ထိုသူတွေ သူ့ခြံရှေ့တွင် စုဝေးနေကြသည်။ လမ်းမမှ ဖြတ်သွားသူတစ်ဦးက ဘာဂဏာန်း ထွက်လဲဟု လှမ်းမေးသံကို ပီပီသသ ကြားရသည်။ လူအုပ်ထဲမှ ပြန်ဖြေသံ တော်တော်များများ ထွက်လာသော်လည်း ထိုနံပါတ်ကို သူ မသဲမကွဲသာ ကြားလိုက်ရ၏။ အခုထိ ထိုနံပါတ်ကို စဉ်းစား၍မရ။

ထို့နောက် ထိုလူအုပ်ရဲ့ လက်ထဲတွင် အစိမ်းရောင် ၊ အနီရောင် ငွေထုပ်များ ပစ်မြှောက်နေသည်ကို တွေ့ရပြန်သည်။ ဘာနံပါတ်လဲ။ ခေါင်းတွေ ပူထူလာအောင် တွေးသော်လည်း ၂ လုံးတွဲ နံပါတ်လေး တစ်ခုကို အစဖော်၍ မရဘူး ဖြစ်နေသည်။ မနက်စာကို မတို့မထိသေး သောကြောင့် သူ့ဇနီးဖြစ်သူက လှမ်းကြည့် သည်ကိုလည်း သူမမြင်။

“ ကော်ဖီတွေ အေးကုန်တော့မယ် ဘာလုပ်နေတာလဲ”
“ ဟာာာ....”
အတွေးထဲ နစ်နေသဖြင့် သူ လန့် သွားမိသည်။

“ ငြိမ်ငြိမ်လေး နေပေးကွာ ဒီမှာအရေးကြီးတာ တွေးနေလို့ ”
“ ရှင် ရုံး နောက်ကျအုံးမယ်နော်”
“ ကျ..ကျ ကွာ”

နားမလည်နိင်စွာ ကြည့်ပြီး သူ့ဇနီးဖြစ်သူ မနက်စာကို ဆက်စားနေသည်။ သူကတော့ တွေးကောင်းတုန်း။ ဒီနံပါတ် မြန်မြန်သိရမှ ဖြစ်မည်။ တစ်မြို့လုံးမှ ဒိုင်တွေဆီကို ထို ဂဏာန်းကို အောထိုးခိုင်းရမည်။ ရှိသမျှ ပုံထိုးခိုင်းရမည်။ နိင်ငံခြား ရောက်နေသည့် သူ့အတွက် မိသားစုကိုဖုန်းဆက်ကာ တမြို့လုံးမှ ဒိုင်တွေထံ သွားထိုးခိုင်းရမည်။ တခြားမြို့တွေအထိပါ ထပ် ထိုးခိုင်းရမည်။ နံပါတ်ထွက်လာချိန် ဒိုင်တွေ အကုန် ပက်လက်လန်ကာ သူ့ ဘဏ်စာရင်းထဲသို့ ငွေတွေ ရောက်လာတော့မည်။

ဒိုင်တွေထံမှ ငွေ သူ့ဆီရောက်ဖို့ လက်တစ်ကမ်း အကွာတွင်သာ ရှိသည်။ ငွေတွေ... ငွေတွေ... ဟာားးး သို့သော် နံပါတ်ကို ဖော်မရသဖြင့် သူ မချင့်မရဲ ဖြစ်နေရသည်။ ငွေထုပ်တွေကို မြင်နေရလျက်နှင့် သူ နံပါတ် မဖော်နိင်တာကြောင့် ဒေါသတွေပါ ထွက်လာသည်။

နာရီကို ကြည့်လိုက်တော့ သူအလုပ်သွားဖို့ အချိန်ကျော်လွန်နေပြီ။ သို့သော် ကိစ္စမရှိ။ ဒီနံပါတ်ကိုသာ ဖော်နိင်ခဲ့ရင် သူတို့ မြန်မာပြည်ပြန်ပြီး အခြေချနိင်ပြီ မဟုတ်လား။ ချမ်းသာခြင်းက လက်တစ်ကမ်း အကွာတွင်သာ ရှိသည်။ ဒိုင်တွေထံမှ ငွေတွေ ... ဒါ သူ့ ပိုက်ဆံတွေပဲ မဟုတ်လား။ သို့သော် ဖော်မရသဖြင့် သူ စိတ်တွေတိုလာသည်။ သူမြင်နေသည်မှာတော့ သူတို့ခြံရှေ့က ပျော်ရွှင်နေကြသော လူတစ်စုဖြစ်သည်။ ထို့ပြင် အစိမ်းရောင် အနီရောင် ငွေထုပ်များဖြစ်၏။

နံပါတ်ကို ဖော်နိင်မလား ဆိုပြီး သူ ကော်ဖီ တစ်ငုံသောက်လိုက်သော်လည်း ထူးခြားမလာ။ အချိန်တွေ တရွေ့ရွေ့ကုန်လာသဖြင့် သူ ဂဏာမငြိမ်ဖြစ်လာသည်။ ချမ်းသာခြင်းရဲ့ လက်တကမ်းထိ ရောက်ပြီးမှ သူလက်လွှတ်ရတော့မည် ထင်သည်။ ဧည့်ခန်းတွင် ခေါက်တုန့် ခေါက်ပြန် လမ်းလျှောက်ရင်း သူ အကြောင်းအရာ တစ်ခုစဉ်းစားလိုက်မိ၏။ ထိုအခါ သူ့ရင်တစ်ခုလုံး ဟိုက်ခနဲဖြစ်ကာ အေးသွားသည်။ လက်ဖျားများပင် ချက်ချင်း အေးစက်လာ၏။


ထို့နောက် အိမ်ဖုန်း ရှိရာကို အပြေးအလွှား သွားမိသည်။ မြန်မာပြည်မှ သူ့အိမ်ဖုန်းနံပါတ်ကို နှိပ်နေရင်း အချိန်မှီပါ့မလား ဟု သူ့ခေါင်းထဲမှာ တရံမလပ် တွေးနေမိသည်။ အရေးထဲမှ မြန်မာပြည်၏ ဖုန်းလိုင်းများက ချက်ချင်းမဝင်။ အထပ်ထပ်ခေါ်ဆိုနေရင်း သူ စိတ်လှုပ်ရှားနေမိသည်။ ၄ ကြိမ်မြောက်လား ၅ ကြိမ် မြောက်လားဟု သူ သတိမထားနိင်သည့် အကြိမ်မှာ ဖုန်းလိုင်းဝင်သွားသည်။

“ဟယ်လို..”

တစ်ဘက်မှ ဖုန်းလာကိုင်သူသည် သူ့အစ်မ ဖြစ်နေသည်။

“ မမ.. ကျွန်တော်ပါ ကိုကိုရှိနေလား မြန်မြန်ခေါ်ပေး”
“ မောင်လေးလား နင်နေကောင်းလား”
“ အဲဒါတွေ နောက်မှ ပြော ကိုကို့ ကိုမြန်မြန်ခေါ်လိုက်”
“အေး.. အေးး”

ထို့နောက် လှမ်းခေါ်သံများ ကြားလိုက်ရသည်။ ခဏကြာပြီးနောက်

“ဟဲ..လို ညီညီ ပြော ဘာဖြစ်လို့လဲ”
“ညီပြောတာ သေသေချာချာနားထောင်... ကြားရလား”
“ အေး ကြားရတယ်ကွ ပြောလေ ”
“ နံပါတ်တွေ ရောင်းပြီးပြီလား ”
“မင်းကလည်း အစောကြီး ရှိသေးတာ ဘယ်လို ရောင်းရအုံးမလဲ”
“ တော်သေးတယ်.. ဒါဆိုရင် ဒီနေ့ မကိုင်နဲ့တော့ အကုန် ပိတ်ထားလိုက်”
“ ဘာဖြစ်လို့တုန်း စီမံချက် ရှိလို့လား”
“ အာာ... မဟုတ်ဘူး.. ဒါပေမယ့် ဒီနေ့ ပိတ်ထားလိုက်ကွာ အရေးကြီးတယ် ”
“ အေး..အေး ပြီးတာပဲ ”

ဖုန်းခွက်ကို ချပြီးနောက် သူသက်ပြင်းမောကြီး ချလိုက်မိသည်။ တော်သေးတယ် အချိန်မှီသေးလို့...။
မဟုတ်ရင် သူ့ ပိုက်ဆံလေးတွေ ပါသွားနိင်သည်။ ဒိုင်တွေထံမှ ငွေကို ရယူဖို့သာ တွေးနေမိသဖြင့် ကိုယ့်ငွေပါသွားနိင်တာကို စောစောကသတိမရမိ။ အချိန်မှီသတိရတာ ကံကောင်းသည်။ သူအလုပ်သွားဖို့ ပြင်ဆင်နေရင်း စိတ်လက်ပေါ့ပါးစွာ လေတစ်ချက်ချွန်လိုက်၏။ နံပါတ်မဖော်နိင်သော်လည်း သူနှင့် သူ့အကို နှစ်ယောက်စပ်တူ လုပ်ကြသော ချဲဒိုင်အတွက် အခုတော့ သူစိတ်ချရပြီ မဟုတ်လား။

အသက်လေးဆယ်

သူတို့ရောက်လာချိန်က ကိုရီးယား ဇာတ်လမ်းတွဲ ပြီးခါစ အချိန်ဖြစ်သည်။  သတင်း လာချိန်မို့ တီဗီကို ပိတ်ရင်း ကုလားထိုင် ပေါ်မှာ ကျွန်တော် ခါးကြောဆန့်  နေချိန်မှာ ရောက်လာကြခြင်း ဖြစ်၏။ သူတို့ဆိုတာက ဥက္ကာတို့ မိသားစုပါပဲ။ ဥက္ကာ ရယ် သူ့ဇနီးနှင်းနှင်း နှင့် ကလေး နှစ်ယောက်ပေါ့။ လက်ထဲမှာလည်း အထုပ်တွေ ဆွဲ လို့ ကျွန်တော့် အိမ်ပေါ်ကို တက်လာကြသည်။  လမ်းမ က ဗျောက်အိုးဖောက်သံ မီးရှူး မီးပန်းသံတွေကိုလည်း မရပ်မနား ကြားနေရ၏။ ဒီနေ့က သီတင်းကျွတ် လပြည့် နေ့ ရောက်ပြီလေ။

“ ကိုကြီးပိုင် ကို ...ကျနော်တို့ လာကန်တော့တာ”
“ လုပ်ပြန်ပြီ ညီရာ... ကန်တော့ဖို့ မလိုပါဘူးဆို.... ဒီလို ပြောနေရတာလည်း ဘယ်နှစ် နှစ်ရှိပြီတုန်း”

ကျွန်တော့်စကား ကြားတော့ ဥက္ကာတို့ ဇနီးမောင်နှံ ပြုံးရယ်ကြ၏။

“ မှတ်ရ လွယ်ပါတယ် ကိုကြီးရ .. အခု အကြီးကောင်က ၆ နှစ်လေ ဒီတော့ ဒီတခါလာကန်တော့တာ ၇  ကြိမ်ပေါ့”

“အကြီးကောင် တောင် ၆ နှစ်ရှိပြီကိုးး အချိန်တွေက အကုန်မြန်လိုက်တာကွာ အရာရာက မနေ့တနေ့ကလိုပဲ ဒါနဲ့... အငယ်မလေးရော ဘယ်အရွယ်တုန်း”

“ သမီးလေးက ၃ နှစ်ပြည့်ပြီးပြီ ကိုကြီးရ အိမ်မှာတော့ သူ့အသံကြီးပဲ... အဖိုးအဖွားတွေရဲ့ အသဲစွဲပေါ့ ”

ကျွန်တော့်အမေးကို နှင်းနှင်းမှ ဝင်ဖြေ၏။ ထိုဖြေသံထဲတွင် ပျော်ရွှင်ကြည်နူးခြင်း နှင့် လန်းဆန်းတက်ကြွခြင်း များပါဝင်နေမည်။ ထို့နောက် သူတို့ လင်မယား ကိုယ်တိုင် မီးဖိုခန်းမှ စတီးလင်ဗန်း ယူကာ ဝယ်လာသော မုန့်များ ထည့်၍ မိသားစု ကန်တော့ကြတော့သည်။ သူတို့ကို ကြည့်ရင်း ပီတိစိတ်ကြောင့် ဝေ့တက်လာသော မျက်ရည်တစ်စကို မျက်တောင်ပုတ်ခတ်ကာ ပြန်ထိန်းလိုက်ရ၏။ ယခင်နှစ်များအတိုင်း ဆုတောင်းပေးခြင်းကို ခံယူပြီးနောက် ဥက္ကာတို့ မိသားစု ပြန်သွာကြသည်။

ဥက္ကာတို့ ကန်တော့ခဲ့သော မုန့် ဗန်းကို ကြည့်ရင်း ကျွန်တော့်ရဲ့ စိတ်သည်  လွန်ခဲ့သည် ၈ နှစ်က သီတင်းကျွတ် ကာလကို ပြန်ရောက်သွားသည်။

................................................................................။

ရပ်ကွက်ထိပ်က လ္ဘက်ရည်ဆိုင်တွင် ကျွန်တော်တို့ အဖွဲ့ ထိုင်နေကြခြင်းဖြစ်သည်။ မကြာခင် ရောက်လာတော့မယ့် သီတင်းကျွတ် အတွက် အစီအစဉ် တစ်ခုခု လုပ်ရန် တိုင်ပင်နေကြခြင်း ဖြစ်သည်။

“ကိုပိုင်.. ဒီနှစ် ဘာလုပ်မယ် တွေးထားလဲ ”
“ ဒီနှစ်တော့ အရင်နှစ်တွေထက်ပိုပြီး ထူးထူးခြားခြား လုပ်ချင်တယ်ကွ ”

ကျွန်တော့် စကားကို တစ်ဖွဲ့လုံး စိတ်ဝင်စားဟန်ဖြင့် သောက်လက်စ ရေနွေးခွက်များကို ချကာ အာရုံစိုက် နားထောင်နေကြသည်။ ရပ်ကွက်အတွက် သာရေး နာရေးနှင့် ရာသီအလိုက် ပွဲတော်များအတွက် ကျွန်တော်မှ လူငယ်တွေကို ဦးဆောင်ပြီး လုပ်လေ့ရှိသဖြင့် ယခုလည်း တိုင်ပင်နေကြခြင်း ဖြစ်သည်။

“ အရင်နှစ်တိုင်းလည်း ရပ်ကွက်ထဲမှာ စည်ကားအောင် လုပ်တာပဲ။ ဒါပေမယ့် ဒီနှစ်တော့အရင်နှစ်နဲ့ မတူအောင် လုပ်ချင်တယ်။ အပူကပ် တဲ့ကောင်ရှိလို့လေ”

“ ဘယ်သူလဲ ”
“ ဟိုကောင်ပေါ့...ဥက္ကာလေ ”

ကျွန်တော်စကားကြောင့် ဝိုင်းကြည့်ကြသဖြင့် ဥက္ကာမှ ဟီး ခနဲ ရယ်ကာအားလုံးကို မျက်နာချိုသွေး ပြသည်။ ဥက္ကာက အသက် ၂၀ ကျော်ခန့်သာ ရှိသေးသော ရပ်ကွက်ထဲမှ လူငယ်လေး ဖြစ်၏။ ရပ်ကွက် ကိစ္စများတွင် တက်တက်ကြွကြွ ပါဝင်သဖြင့် ကျွန်တော်တို့မှ ညီငယ်လေး တစ်ယောက်လို ချစ်ခင်ရသူ ဖြစ်သည်။

“ ဒီလိုပါ အကိုတို့ရာ.. ကျွန်တော့်မှာ ကျောင်းပြီးထဲက နှင်းနှင်းကို မတွေ့ရတော့တာ.. သူ့အိမ်က အပြင်ကို လုံးဝ ပေးမထွက်ဘူးဗျာ.. ကျွန်တော်တို့ ချစ်သူဖြစ်နေတာ သိသွားလို့လား မသိဘူး။ အဲဒါကြောင့် သီတင်းကျွတ် ပွဲတော်ကို စည်စည်ကားကားလေးများ လုပ်နိင်ခဲ့ရင် သူ့ညီမ ဝမ်းကွဲတွေနဲ့ဖြစ်ဖြစ် အပြင်ထွက်ရင် ထွက်လာနိင်တယ်လေ။ ဒါကြောင့် ကိုကြီးပိုင် ကို အကူအညီ တောင်းထားရတာ... သူ့ကိုလွမ်းလှပြီ အကိုတို့ရာ”

“ အော်... ရည်ရွယ်ချက် ကြီးပါပေ့ကွာ ”
“ ကိုယ်ချင်းစာ လိုက်ပါ ငဖြိုးရာ ရပ်ကွက်လည်း စည်သွားတာပေါ့ ”  ကျွန်တော့်စကားကြောင့်

“ အေးပါ ကိုယ့်ညီလေး အတွက်ရော ရပ်ကွက် အတွက်ရော ဆိုတော့ လုပ်ပေးရမှာပေါ့ ”

ငဖြိုး နှင့် တခြားသူများ၏ သဘောတူညီမှု ရသဖြင့် ဥက္ကာ ပျော်ရွှင်တက်ကြွ နေတော့သည်။ ထို့နောက် စိတ်ကူးထားသည့် အစီအစဉ်ကို ပြောပြလိုက်၏။ ယခင်နှစ်များနှင့် မတူသော အစီအစဉ်မို့ အားလုံး သဘောကျကြသည်။ ထို့နောက် အသေးစိတ် ညှိနှိုင်းမှုများ၊ တာဝန်ခွဲဝေ မှုများကို ဆွေးနွေးတိုင်ပင်ကြသည်။ ရာသီအလိုက် ပွဲတော်များအတိုင်း သီတင်းကျွတ်ပွဲတော် အတွက် ရပ်ကွက်ထဲ အလှူခံထွက်ကြသည်။ အလှူငွေများ နှင့် ကျွန်တော်တို့ ထည့်ဝင်ငွေများကို စုပေါင်းလိုက်ချိန်တွင် ရန်ပုံငွေ အင်အား တောင့်တင်းသွားပြီ။ ထို့နောက်ရပ်ကွက်စတိုးဆိုင်မှ ကိုဝကြီးကို ကျွန်တော်တို့ ဖြစ်ချင်သော အစီအစဉ် ကိုပြောပြကာ အကူအညီသွားတောင်းကြသည်။ ကိုဝကြီးက ပုံတူပန်းချီဆွဲ တော်သူဖြစ်သည်။ ယခုလည်း ပန်းချီ ဆွဲဖို့ရန် အကူအညီတောင်းကြခြင်းဖြစ်သည်။

“မင်းတို့ လုပ်ချင်တဲ့ မီးထွန်းပွဲ ပုံစံမျိုးကို ဟိုးအရင်က ရန်ကုန်က လမ်းတချို့မှာ လုပ်ခဲ့ဖူးတယ်ကွ”

ကိုဝကြီး စကားကြောင့် ကျွန်တော် စိတ်ဓါတ်ကျသွားသည်။ စိတ်ကူး အသစ်အဆန်းဟု ကျွန်တော်က ထင်ထားခြင်းကြောင့် ဖြစ်သည်။

“ ဟုတ်လား ကိုဝကြီးရာ တိုက်တိုက်ဆိုင်ဆိုင်ဗျာ။ ဒါဆို ကျွန်တော်တို့ လုပ်လို့ ကောင်းပါ့မလား”

“ဘာမှမဖြစ်ဘူးလေ။ လုပ်ပေါ့။ ဒီမှာက ဘယ်သူမှ မလုပ်ဖူးသေးတော့ ထူးထူးခြားခြား အစီအစဉ် ဖြစ်မှာပါ။”

“ ဒါဆို ပန်ချီတွေကို ကိုဝကြီး ဆွဲပေးဗျာ လိုမယ့် ပစ္စည်းတွေကိုပြောလေ”

“အဓိက လိုတာက ဆီစိမ် စက္ကူရောင်စုံပဲ။ ငါ ရန်ကုန်မှာ ပစ္စည်းသွားဝယ်ရင်း ဝယ်လာခဲ့လိုက်မယ်။ မင်းတို့သာ မီးပုံးတွေ လုပ်ထားကြပေါ့”
“ ဟုတ်ပြီ ကိုဝကြီး.. ဒါဆို မီးပုံးတွေရိုက်ဖို့ ကျွန်တော်တို့ စီစဉ်ထားလိုက်မယ်။”

ဒီနှစ်အတွက်က ယခင်နှစ်များကလို ရပ်ကွက်လမ်းမကြီးတလျှောက် ဝါးတိုင်စိုက်ကာ မီးပုံများ ထွန်းကြခြင်းထက် ပို၍ထူးခြားစွာ စီစဉ်ထားသည်။ ကျွန်တော်တို့ စီစဉ်ထားပုံက အလျား တစ်ပေခွဲ  အနံ တစ်ပေ ခန့်ရှိသည့် ခပ်ရှည်ရှည် မီးပုံးများ လုပ်ကြ၏။ ထူးခြားသည်က မီးပုံးရဲ့ မျက်နာစာကို  ဆီစိမ် စက္ကူ ကာထားကာ ထို ဆီစိမ် စက္ကူပေါ်တွင်တော့ ကိုဝကြီး၏ လက်ရာ တကွက် ကာတွန်းများကို ဆွဲစေသည်။

ကာတွန်း(ဦး)ငွေကြည် နှင့် အခြား ကာတွန်း ဆရာများ၏ ဟာသ တကွက်ကာတွန်းများကို ပုံတူပြန်ဆွဲသလို ကိုဝကြီးနှင့် ကျွန်တော်တို့၏ စိတ်ကူးသက်သက် ဟာသ လေးများကို ကာတွန်းဖြင့် သရုပ်ဖော် ပုံ ဆွဲထားခြင်းဖြစ်သည်။  မီးပုံး၏ ဘေးနှစ်ဘက်ကို အရောင်မတူသော ဆီစိမ်စက္ကူများဖြင့် ကာထားပြီး အနောက်ဘက်ကိုတော့ ကတ်ထူ စက္ကူဖြင့် ကာရံထားသည်။ ဆီစိမ်စက္ကူ ရောင်စုံများကြောင့် အဝေးမှ ကြည့်လိုက်လျင် မီးပုံးရောင်စုံများ ဖြစ်သွားသလို အနီးကပ် ကြည့်လျင်တော့ ရယ်မောရသော စာသားများနှင့် ကာတွန်းပုံ များကို တွေ့ရမည် ဖြစ်သည်။

ကျွန်တော်တို့မှ မီးပုံး များ အားသွန်ခွန်စိုက် ရိုက်ကြသလို ကိုဝကြီးမှလည်း ကျွန်တော်တို့ ရှာဖွေပေးသော ကာတွန်း စာအုပ်များမှ ရယ်ရသော တကွက်ကာတွန်းများကို ကြည့်ကာ ညဥ့်နက်သည်အထိဆွဲ ပေးသည်။ မီးထွန်းပွဲနေ့ရောက်မှ ရပ်ကွက်မှ လူများကို အံ့သြသွားစေချင်စိတ်ကြောင့် ကျွန်တော်တို့ လုပ်ဆောင်နေမှုများကို တတ်နိင်သမျှ သတင်း မထွက်အောင် သိုသိုသိပ်သိပ် လုပ်ကြသည်။ ထိုသို့ဖြင့် သီတင်းကျွတ် ပွဲတော်ရောက်ရန် တဖြည်းဖြည်း နီးကပ်လာသည်။ မငြီးမညူ တက်တက်ကြွကြွ လုပ်သူကတော့ ဥက္ကာဖြစ်သည်။ ပစ္စည်း တစ်ခုခု လိုသည် နှင့် အပြေးအလွှား ရှာဖွေပေးသဖြင့် သူ့ကိုကြည့်ကာ စကြနောက်ကြရင်း အားလုံး ပျော်ရွှင်တက်ကြွ နေကြသည်။

ကိုဝကြီး ဆွဲပြီးသော ကာတွန်းများကို မီးပုံးများတွင် ကပ်ကြသည်။ လပြည့်နေ့ မတိုင်ခင် နေ့လည်ခင်းတွင် ရည်ရွယ်ထားသော မီးပုံးအလုံး ၁၀၀ အဆင်သင့်ဖြစ် နေလေပြီ။ လပြည့်နေ့ ရောက်တော့ မနက်ထဲက ကျွန်တော်တို့အဖွဲ့ ရပ်ကွက်၏ လမ်းမကြီး တစ်လျှောက် ဘေးနှစ်ဖက်လုံးတွင် ပေ ၂၀ စီ ခြားပြီး ဝါးတိုင်စိုက်ရန် တွင်းတူးကြသည်။

“ ကိုကြီး.. ကျနော့် ကောင်မလေး ထွက်လာလို့ ရပါ့မလား မသိဘူးနော် ”

တွင်းတူးနေရင်း ဥက္ကာမှ စိတ်လှုပ်ရှားစွာ မေးသဖြင့် ကျွန်တော်လည်း တွေဝေ သွားရသည်။ သူ့မျက်နာကို ကြည့်မိတော့ စိုးရိမ်စိတ်ဖြင့် အနည်းငယ် နွမ်းလျနေသည်။

“ ထွက်လာမှာပါကွာ။ သေချာအောင်လို့ ညနေကျရင် ငါ သူ့အမေကြီးကို သွားပြောပေးထားပါ့မယ် ”

“ တကယ်လား ကိုကြီး ... ဘယ်လိုပြောမှာလဲဟင် ”

“ နှင်းနှင်းကို ဒီညမီးထွန်းပွဲ လွှတ်လိုက်ပါလို့ ဥက္ကာ စောင့်နေရှာတယ် လို့ ပြောလိုက်မှာပေါ့ ”

“ ဟာ... ကိုကြီးကလဲ အဲဒီလို ပြောလိုက်မှ လုံးဝကို မတွေ့ရတော့ဘူး ဖြစ်သွားမှာပေါ့ ”

“ အလကား နောက်တာပါကွာ... ဒီညမီးထွန်းပွဲရှိတယ် အန်တီတို့ လာခဲ့ကြပါအုံးလို့ ပြောမှာပေါ့ ”

“ သူ့အမေပါရင်တော့ မလွယ်ဘူး ကိုကြီးရ... အင်းလေ..ဘယ်တတ်နိင်မလဲ နှင်းနှင်း မျက်နာကို မြင်ရရင် ကျေနပ်ရမှာပဲ ”

“ အေး ပေါ့ကွ မတွေ့ရတာထက်တော့ တော်သေးတာပေါ့ ”

“ဟုတ်ကဲ့ ကိုကြီး ”

ညနေပိုင်းရောက်တော့ ကျွန်တော်နှင့် သူငယ်ချင်း တစ်ချို့မှ ယနေ့ည ရပ်ကွက်ထဲတွင် မီးထွန်းပွဲ ရှိကြောင်း အရင်နှစ်များနှင့် မတူကြောင်း လမ်းလျှောက်ထွက်ခဲ့ကြဖို့ လိုက်ပြောကြသလို ကျန်သည့် သူများကလည်း တူးထားသော တွင်းများတွင် ဝါးတိုင် စိုက်ကြသည်။ ထိုဝါးတိုင်များတွင် မီးပုံးများ လိုက်ချိတ်ကြသည်။ ထို့ပြင် ဝါးတိုင်များ၏ ကြား တွင် တွင်းငယ်ကလေးများ တူးကာ ဗန်ဒါ ရွက် ၄ ရွက်ကို တွင်းထဲသို့ တဝက်ခန့် ကန်တော့ ထိုး ထိုးကာ အလယ်တွင် ဖယောင်းတိုင်များ စိုက်ကြသည်။ ဗန်ဒါရွက်များ ကာရံထားသည့် အတွင်းမှ ထွက်ပေါ်လာသော ဖယောင်းတိုင် မီးရောင်သည် အဝေးမှ ကြည့်လိုက်လျင် ဆီမီးခွက်များ ထွန်းထားသကဲ့သို့ လှပ နေ၏။ အစိမ်းရောင် နှင့် အနီရောင် အရွက်များကို မျှပြီး ထည့်ထားသည့်အတွက် ပို၍ ကြည့်ကောင်းခြင်း ဖြစ်မည်။

နေဝင်သွားပြီးသည့်နောက် အမှောင် ရောက်လာချိန်တွင် မီးပုံးများနှင့် ဗန်ဒါရွက်များ အတွင်းမှ ဖယောင်းတိုင်များကို မီးညှိလိုက်ကြတော့သည်။ မီးပုံးရောင်စုံ တန်းကြီးကို အဝေးမှ ကြည့်ကာ ကျွန်တော်တို့ ပီတိဖြစ်နေကြသည်။ ည ၇ နာရီခန့်တွင်တော့ လမ်းမတစ်လျှောက် လူ များ တဖြည်းဖြည်း စည်ကားလာပြီ။

ရပ်ကွက်ထဲမှ လူများလည်း မိသားစု လိုက် လမ်းလျှောက်ကာ ကိုဝကြီး၏လက်ရာ ကာတွန်းများကို ဖတ်ပြီး တခွီးခွီး ရယ်မောကြတော့၏။ သူတို့ရယ်မောသည်ကို မြင်သဖြင့် ကျွန်တော်တို့ လည်း ကြည်နူး ပျော်ရွှင်ကြရသည်။

တဆင့်စကား တဆင့်နားဖြင့် လမ်းမတွင် လူများ ပို၍စည်ကားလာသည်။ ညနေခင်းဖွင့်လေ့ရှိသော မစိုး၏ အကြော်စုံဆိုင်မှာလည်း ခုချိန်ထိ လူစည်ကားနေဆဲ ဖြစ်သလို  ရပ်ကွက်ထိပ် လ္ဘက်ရည်ဆိုင်မှလည်း  မနက်ခင်းတွင်သာ ကြော်လေ့ရှိသော ပလာတာ ၊စမူဆာ များကိုကြော်ကာ ရောင်းချပေးသည်။ ငဖြိုးနှင့်မင်းသူ တို့နှစ်ယောက်က မီးရှူးမီးပန်း ဆိုင်ကိုစပ်တူ ဖွင့်ကြသည်။

ကလေးများလွှတ်ကြသော မီးရှူးမီးပန်းများနှင့် လူငယ်များလွှတ်ကြသော မီးပုံပျံများမှာ တစ်လုံးပြီးတစ်လုံး ကောင်းကင်ပေါ်သို့ လွှင့်တက်နေတော့သည်။ လမ်းတလျှောက် အိမ်များမှ ထွန်းထားသော မီးရောင်စုံများကြောင့် ရပ်ကွက်လမ်းမ တစ်လျှောက်လုံး လှပလင်းထိန်နေတော့သည်။ ရပ်ကွက်ထဲတွင် ညတိုင်း လမ်းလျှောက်ကာ လိုက်ရောင်းလေ့ ရှိသော ပြောင်းဖူးပြုတ်၊ မုန်ဖက်ထုပ်သည် ကြီးကလည်း မီးပုံးတိုင်များကြားတွေ  ထိုင်ရောင်းနေသည်။ ကိုဝကြီးမှ သူ၏ စတိုးဆိုင်ရှေ့တွင် စားပွဲခုံ တစ်လုံးချကာ ဖယောင်းတိုင် အထုပ်များကို တင်ထားသည်။ မီးထွန်းပွဲ အတွက် ဖယောင်းတိုင်များ လှူဒါန်းနိင်သည်ဟု ရေးထားသဖြင့် ရပ်ကွက်ထဲမှ လူအချို့ ဖယောင်းတိုင်အထုပ်များ ဝယ်ကာ ကျွန်တော်တို့ အဖွဲ့ကို လှူကြသည်။ လူငယ်များက ကုန်ခါနီး ဖယောင်းတိုင်များကို အသစ်လဲလှယ်ကြသဖြင့် မီးရောင်စုံတန်းကြီးမှာ အလင်းရောင် လျော့ကျသွားရသည် မရှိတော့။

ရယ်မော ပျော်ရွှင်ခြင်းသည် စိတ်နှလုံးသားများကို နုညံ့စေမှန်း ကျွန်တော်သိသည်။ ထို့ကြောင့် မိခင်နှင့် အတူ လမ်းလျှောက် ထွက်လာသော နှင်းနှင်းတို့ ညီမ ဝမ်းကွဲများ လက်သို့  ဖယောင်းတိုင် အထုပ်များ ထည့်ပေးကာ ကုန်ခါနီး ဖယောင်းတိုင်များကို လဲလှယ် ပေးဖို့ အကူအညီ တောင်းလိုက်သည်။ ထူးခြားသော မီးထွန်းပွဲနှင့် ရယ်မော ပျော်ရွှင်ရခြင်းကြောင့် သမီးနှင့် ပါတ်သတ်လျင် သဘောထား တင်းမာတတ်သော သူ့အမေ ကိုယ်တိုင်ပင် ဖယောင်းတိုင် အထုပ်များ ဝယ်ပြီး ကျွန်တော့်လက်သို့ ပေးအပ်ရင်း သူ့သမီးနှင့် တူမများကို မီးကူထွန်းပေးရန် ထားခဲ့ကာ အိမ်သို့ ပြန်သွားလေသည်။ 

ဥက္ကာတစ်ယောက်မှာ ဝမ်းသာလွန်း၍ ကျွန်တော့်လက်ကို ကိုင်စွဲကာ အကြိမ်ကြိမ် ကျေးဇူးတင်ကြောင်း ပြောနေတော့၏။ ဥက္ကာတို့ ကဲ့သို့ ရပ်ကွက်ထဲမှ အဆင်ပြေစ ပြုနေသော စုံတွဲလေးများသည်လည်း  မီးပုံးများကြားတွင် ဖယောင်းတိုင်များ ထွန်းညှိကြရင်း ပြုံးပြုံးရွှင်ရွှင် ဖြစ်နေကြသည်။ တစ်ယောက်မျက်နာ တစ်ယောက်ကြည့်ကာ ကြည်နူးနေဟန်ကို မြင်တွေ့ရသဖြင့် ကျွန်တော်ပါ ကြည်နူးနေမိတော့သည်။ သို့သော် ကျွန်တော့်၏ ကြည်နူး ရမှုသည် နောက်တစ်နေ့တွင် ပျောက်ဆုံး သွားရတော့သည်။ ဥက္ကာရော နှင်းနှင်း ပါ ရှာ မတွေ့တော့။ သူတို့ ခိုးပြေးကြလေပြီ။

ကျွန်တော်လည်း ဒေါသထွက်သလို နှင်းနှင်း အမေလည်း သွေးတက် နေတော့သည်။ နှင်းနှင်းအမေမှာလည်း ကျွန်တော့်ကို အပြစ်မတင်ရဲ တင်ရဲ ဖြစ်နေသဖြင့် သူ့တူမများကိုသာ ဆူပူနေတော့သည်။ နောက် ၁၀ ရက်ခန့် ကြာမှ သူတို့ နှစ်ယောက်လုံးကို ပြန်ရှာတွေ့သည်။ တခြားရွေးချယ်ဖွယ်ရာ နည်းလမ်းမရှိတော့သဖြင့် လက်ထပ်ပေးလိုက်ရတော့၏။ ချစ်သူစုံတွဲများ ခိုးပြေးခြင်းကို အနည်းငယ်သဘောမကျသော ကျွန်တော်ကတော့ ဥက္ကာကို တော်တော် စိတ်ဆိုးနေမိသည်။ နှင်းနှင်းကို သူ့မိဘများထံ ပြန်အပ်သည့် နေ့တွင် ဥက္ကာ ကျွန်တော့်ထံ ရောက်လာသည်။

“ ကျနော်လည်း အစီအစဉ် မရှိပါဘူး ကိုကြီးရာ။ နှင်းနှင်းကို သူ့အဒေါ်တွေဆီ ပို့ဖို့ လုပ်နေတယ် ပြောတာနဲ့  ခိုးပြေးလိုက်ရတာပါ။ စိတ်မဆိုးပါနဲ့ ကိုကြီး ကျနော် တောင်းပန်ပါတယ်။ အခုလို ကျနော်တို့ ပေါင်းခွင့်ရတာလည်း ကိုကြီး ကျေးဇူးပါ”

ကျွန်တော်ကို သူတို့ရဲ့ ဖူးစာရေးနတ်ဟု သတ်မှတ်လိုက်ကြကာ နောက်တစ်နှစ် သီတင်းကျွတ်မှ စ၍ နှစ်စဉ် နှစ်တိုင်း သူတို့ မောင်နှံ ကျွန်တော့်ကို လာကန်တော့ကြသည်။  ခုတော့လည်း ဥက္ကာတစ်ယောက် အချိန်ကာလ တစ်ခုကို ကျော်လွန်ခဲ့ပြီးသည့်အတွက် ယောက္မတွေနှင့် ပြေလည်နေလေပြီ။ သဘောထား တင်းမာပါသည် ဆိုသော အဖွားကြီး ကိုယ်တိုင်ပင် မြေးများကို လက်က မချတော့။ သဲသဲလှုပ်ချစ်နေကြပြီ။

။........................................................................။

ကျွန်တော့် ဘဝတွင် ကြုံခဲ့ရသော သင်ခန်းစာနှင့် အဆင်ပြေပြေဖြစ်နေသော ဥက္ကာတို့ ဖြစ်စဉ်ကို ကြည့်ကာ ချစ်သူတွေ ခိုးပြေးခြင်းကို သဘောမကျသော ကျွန်တော်လည်း အမြင်တွေ ပြောင်းခဲ့ရပြီပေါ့။  ချစ်သူ နှစ်ယောက်လုံး စိတ်ထား မပြောင်းလဲရင် ဘယ်သူက ဘယ်လို ခွဲ လို့ရပါ့မလဲဟု အရင်ကတော့ ခိုင်ခိုင်မာမာ ယုံကြည်ခဲ့ဖူးသည်။ ဒါပေမယ့် ဘယ်လိုပဲ ပေါင်းပေါင်း မြန်မြန်ပေါင်းရတာ အသေချာဆုံးပဲ အဆင်ပြေခြင်းကို နောက်မှ ဖန်တီးယူမည် ဆိုသော ဥက္ကာ၏ လုပ်ရပ်ကို ခုတော့ ကျွန်တော် သဘောကျစ ပြုနေပြီ။

အတူတူနေခွင့် ဆိုတာ ဘဝခရီးလမ်းကို အတူတူသွားခြင်း ဆိုလျင် ဥက္ကာ နှင်းနှင်းကို ခိုးပြေးသည့်အဖြစ်က ဘဝခရီးလမ်းအတွက် ကားပေါ်အရင်တက်ပြီးမှ လက်မှတ်ကို နောက်မှ ဝယ်သလိုမျိုးပါပဲ။ အစီအစဉ်က အနည်းငယ် ရှေ့ရောက်နေသော်လည်း ကားပေါ်ရောက်နေတာထက် ဘာသေချာအုံးမလဲလေ။ ခုံနေရာ မရရင်တောင် သွားချင်တဲ့ ခရီးလမ်းပေါ်မှာ လိုက်ပါခွင့် ရနေပြီမဟုတ်လား။  ကိုယ့်ဆရာတို့လည်း မစာနာတတ်တဲ့ ခပ်တင်းတင်း ယောက္ခမလောင်းတွေနဲ့ ကြုံနေခဲ့ရင် ကားပေါ်သာ အရင်တက်ကြဗျ။ လက်မှတ်ကတော့ နောက်မှ ဝယ်တာပေါ့လေ။ ခဏလောက် မတ်တပ်ရပ် စီးရမှာတော့ မကြောက်နဲ့ပေါ့။

ကျွန်တော်လား....ကျွန်တော်ကတော့ ကားလက်မှတ် အရင်ဝယ်ဖို့ ကြိုးစားရင်း ထွက်ခွာသွားသော ကားကို ငေးကြည့် ကျန်ခဲ့ရသူပါ။

ကန်တော့ပြီး ပြန်ခါနီးတွင် ကျွန်တော့် အနား ကပ်ခါ ဥက္ကာ တိုးတိုးလေး ပြောသွားသော စကားကို ကြားယောင်လိုက်မိသည်။ “ သီတင်းကျွတ်ပြီနော် ကိုကြီး ဒီအတိုင်းပဲ နေတော့မှာလား ” တဲ့လေ။ ထိုအချိန်တွင် ဘေးအိမ်မှ ထွက်ပေါ်လာသော သီချင်းသံက ကျွန်တော့် နားစည်ထဲကို ဖြတ်သန်းကာ နှလုံးသား တည့်တည့်သို့ ဝင်ရောက်သွားတော့သည်။

“ အသက်လေးဆယ် ... လူတွေမေးတယ်
ဘယ်တော့များမှ စားရမှာလဲ....။
ဟန်ဆောင်ရပြီ .... လူတွေမသိအောင်
အပြုံးလေးနဲ့ လိမ်ရပြီ...။ ”